今日係中環揾食，好耐冇食泰式串燒，就醒起呢間位於老蘭既泰式串燒吧，上次試過晚餐，今日試下午餐先。
原來午餐幾抵食， 有幾款選擇，$66一份，免加一。午餐比平時正價平幾蚊，仲包一杯野飲。
於是我哋兩個人叫咗一份泰式青咖喱牛腩飯餐再加一大堆串燒，全部叫晒我哋鍾意既口味，正呀！
d串燒一齊上，香噴噴，全部都醃得好好味，味道微甜，香口惹味，仲大大串啖啖肉，係我呢d食肉獸既最愛！
白鱔$60，超爽滑，少少彈牙，質感好似鰻魚。
牛仔骨 $43，好淋，一d都唔韌，調味好食到唔洗點醬就咁食都得。
豬頸肉 $22，燒得薄脆香口。
豬牛雞肉 各$18一串，超抵食。牛肉雖有少少筋但係啖啖肉；雞肉嫩滑；豬肉香口好味！
d串燒本身都好食唔乾，但加埋醬料更好食。隨碟奉上5種醬料，分別為沙爹醬，泰式紅雞醬，芫茜酸辣醬，青辣椒醬，烤牛肉醬。泰式紅雞醬甜甜地好開胃，芫茜酸辣醬又酸又辣好好味，烤牛肉醬辣辣地，青辣椒醬辣得黎唔會好辣我覺得最好食！
泰式青咖喱牛腩飯個樣平平無奇，但個青咖喱堅好味，微辣帶梛香，送白飯正！牛腩有五舊，都炆得尚算淋，配菜有青豆角，泰式茄子同翠玉瓜，新鮮爽脆。$66中環午飯抵食。
凍檸水 (跟餐)大大杯，叫左走甜。可以揀奶茶或檸茶。
座位要自己揾，係收銀落完單找數就自己帶埋個數字牌坐低等食。呢個價錢同質素係中環黎講都算係抵，特別大推泰式串燒！
此物業由您擁有或管理嗎？ 免費認領您的企業詳情，即可回應評論、更新檔案和進行更多操作。