去開K-11 Artus Staycation，就順便同男朋友行下尖東海傍行到南洋中心呢到，俾間餐廳既半露天座位吸引左入去…成間酒吧既裝修同menu上面既飲品都充滿住藝術氣息

醉香脆皮燒雞+香茅飯:waiter好建議我地要試呢個！成日有種出街食燒雞會伏既感覺，但呢個有驚喜！個皮係脆身！而入面既肉仲keep到好嫩滑，加埋惹味既醬汁，絕配個人覺得香茅飯配都幾夾！

燒雞泡魚乾:食落煙韌有嚼勁，越咬越香口，上面配左少少7味粉幾惹味，點沙律醬又夾！傾計送酒幾唔錯，同埋份量都算多，有成2大片，出面好多餐廳都係得一塊

Portrait the frame cocktail:係餐廳既自創cocktail飲落好fresh面頭仲配左片好薄脆既芒果乾

今日約朋友去尖東行下，順便搵地方食下野聚下，員工態度好好，仲會推介有D 咩好食，酒吧餐廳另一特色就係佢有D 好岩打卡既cocktail

❣️白鱔 秘制燒汁
無去BBQ，都好耐無食過白鱔啦，熱辣辣既燒白鱔，白鱔超級肥美彈牙唔乾身，加埋佢既醬汁堅好食，更加帶出鱔既鮮味，好有水準

❣️醉香脆皮燒雞(半隻) 香茅油飯
呢個真係好有誠意好抵食，外皮外脆內嫰，半隻雞真係無花無假，再加埋油飯真好鬼香呀仲有佢D 配菜，醃青瓜好好食，又可以中和返燒雞嘅火氣，必吃之選

❣️黑松露薯條
金黃色炸薯條，帶有黑松露味別有特色，份量都幾多

❣️See my pearl
重頭戲打卡之選，我仲望住調酒師精心炮制呢杯cocktail，酒精濃度唔算高，味道好易入口，好岩女仔飲，色調上真係好靚，杯面加左少少芝士碎，鹹鹹甜甜，原來會好夾

❣️燒牛肉青芒果柚子沙律
牛肉有五至六塊，仲要係7成熟左右，厚身牛肉又焦香，有啲質素！青芒果爽口清甜，配合柚子果肉，作為前菜非常合開胃☺️
************************************
❣️醉香脆皮燒雞 配香茅油飯
佢個名真係改得好好，因為食落就好似個名一樣，雞帶少少酒香，肉質幼滑，皮薄又脆，同時唔會啖啖肥膏！
油飯唔會太過油，輕輕上一上色，有淡淡的香茅味散發出來，同醉雞嘅味道互相輝映
************************************
❣️see my pearl + diamond black
see my pearl-棉花糖味嘅gin再加上少少蜜糖，非常易入口
Diamond black-酒味比較重，但酒味重得黎飲到佢斑斕葉嘅香味，再加柚子sake米味，配上加入左竹炭粉嘅冰，型格又好飲！我個人就鍾意呢杯多啲❤️

Happy Friday約左朋友係尖東食飯飲野，南洋中心有唔少酒吧，夜晚有唔少人幫襯，都幾熱鬧。餐廳係正新世界酒店既對面，入面幾大，都坐得幾舒服。

⭐️ 龍蝦汁海鮮意大利扁麵
海鮮分別有青口、鮮蝦、魷魚、蜆肉等。龍蝦汁味道好濃郁，意粉亦相當掛汁，令人食唔停口。

⭐️ 香䓤露荀牛柳粒炒飯
一上碟就已經聞到好香，牛柳粒口感彈牙，米飯炒到粒粒分明，充滿光澤。

⭐️ Paloma (Arquitecto Blanco, Lime, Grapefruit, Soda, Salt)
餐廳主打飲cocktail，當然要叫番杯試下。呢杯coctail用左tequila做base，感覺好清新，亦唔會令人覺得有藥水味。

今晚收工去左一間位於尖沙咀既酒吧餐廳chill一chill，叫Avenue75。裝修以海藍色為主調，燈光昏暗，音樂輕鬆。星期三晚Happy Hours都好多人。

餐牌主要係小食，有串燒，都有主菜，意大利粉同炒飯。

第一次黎，叫左一個主菜同一份Asian tapas試試。

炭燒墨魚柳 $95 另加一

上枱已經聞到好香，炭燒墨魚柳一客兩大塊切片，方便食用。墨魚柳燒得少少燶，食落又彈牙，好味。另上酸辣汁，有少少辣，點左汁食更開胃，伴有少少青瓜同車厘茄。呢個價錢有呢個份量唔貴呀。

燒原條牛肋骨，菠蘿青瓜沙律 $268 另加一

燒原條牛肋骨真係有條骨比你，起哂d牛肋肉，唔洗切。牛肋肉整得好夠腍，又重牛味，而肉汁豐富，加埋上面既燒肉汁非常好食。另上泰式酸辣汁，點左食都好味。沙律除咗醃酸既青瓜同菠蘿之外，仲有少少沙律菜同車厘茄。

今餐食物唔錯，估唔到呢間酒吧餐廳既水準都咁高。